अहमदाबाद : ‘फर्स्ट टेक’ या राष्ट्रीय पातळीवरील पेंटिंग, प्रिंट्स, सिरॅमिक व शिल्पकला क्षेत्रातील स्पर्धेत पुण्याच्या चारुदत्त पांडे यांनी पहिल्या दहा विजेत्यांमध्ये स्थान पटकावले आहे. देशाच्या कानाकोपऱ्यातून आलेल्या अंदाजे दोन हजार ३५० कलाकृतींपैकी १३० कलाकृतींची निवड प्रदर्शनासाठी करण्यात आली आणि त्यातून सर्वोत्कृष्ट दहा कलाकृतींची निवड पुरस्कारासाठी करण्यात आली. त्यामध्ये चारुदत्त पांडे यांच्या अॅक्रेलिक पेंटिंगचा समावेश आहे.
चारुदत्त पांडे यांची कलाकृती म्हणजे कॅनव्हासवर अॅक्रेलिक पेंटिंग असून, त्याचे शीर्षक ‘ब्रिदिंग’ असे आहे. ही कलाकृती अंतर्गत स्थलांतराची संकल्पना व मूलभूत गरजांमध्ये वाढ याविषयी आहे. जीवनाच्या धावपळीत स्वतःचा शोध घेण्याचा प्रवास या पेंटिंगमध्ये चितारला आहे.
अबिर चॅरिटेबल ट्रस्टच्या सहयोगाने क्लॅरिसने अहमदाबाद येथे नुकतेच या वार्षिक उपक्रमाचे आयोजन केले होते. देशभरातील वेगवेगळ्या क्षेत्रातील कलाकार यामध्ये सहभागी झाले होते. त्यांनी सादर केलेल्या कलाकृतींचे मूल्यमापन उमंग हुथीसिंग, सुबोध केरकर, ब्रिंदा मिल्लर, जयंती रबाडिया व वीर मुंशी या मान्यवर परीक्षकांनी केले.
विजेत्यांना क्लॅरिसचे उपाध्यक्ष व व्यवस्थापकीय संचालक अर्जुन हंडा, अॅस्ट्रल पॉलिटेक्निक लि.चे व्यवस्थापकीय संचालक संदीप इंजिनीअर आणि ‘एबीआयआर’च्या संस्थापक रुबी जागृत यांच्या हस्ते अहमदाबाद येथे गौरवण्यात आले. ‘फर्स्ट टेक’ बरोबरच्या सहयोगाविषयी बोलताना, अर्जुन हंडा म्हणाले, ‘भारतात समकालीन कलेच्या बाबतीत प्रचंड गुणवत्ता आहे. मला कलेमध्ये रुची असल्याने अनेक उदयोन्मुख कलाकारांचे काम पाहण्याची संधी मिळाली. देशभर विपुल गुणवत्ता आहे आणि या कलाकारांना थोडे उत्तेजन व आणखी विकसित होण्यासाठी व्यासपीठाची आवश्यकता आहे. फर्स्ट टेकबरोबर असलेला सहयोग म्हणजे समकालीन कलाकारांना शाश्वत पद्धतीने योग्य व्यासपीठ उपलब्ध करण्याचा उपक्रम आहे.’
यंदाच्या स्पर्धेविषयी बोलताना, रुबी जागृत म्हणाल्या, ‘या वर्षी आम्हाला भारतातील अनेक शहरांतून भरघोस प्रतिसाद मिळाला. या वर्षी सादर करण्यात आलेल्या कलाकृतींमधील प्रोफेशनलिझम व सोफिस्टिकेशन यामध्येही वाढ झाली आहे. येत्या काही वर्षांतही हेच चित्र दिसून येईल, अशी अपेक्षा आहे.’
